مرحبا بالزوارالكرام ستايل كندا موقع الكتروني يهتم بكل مايخص الشأن الكندي والتي تهم المقيم والمهاجر واللاجيء على الأراضي الكندية

سلبيات وايجابيات كندا من تورونتو...من وجهـــة نظر لاجيء .....الجزء الثاني



اتكلمت عن البنك مثل ماكلتلكم خواني هذا البنك سهل بالتعامل وتلكون موظف او ثلاث يتكلمون اللغة العربية غالبا في اغلب الافرع وهذا اكيد يفيد في البداية ....
التعامل هنا غالبا بالفيزة مو كاش او كارت البنك ويسموه (دبت كارت)هم عندهم نوعين حساب (جيكن اكاونت) (سيفنك اكاونت) الحساب (سيفنك )تجي علي فائدة سنويةقليلة ..
اي فاتورة تجيك الى البيت فاتورة التلفون الارضي والنت والتلفون الموبايل اغلب الناس تروح تدفعها بالبنك بس البعض يروح يدفعها للشركات الخاصة بكل فاتورة ...بس الافضل البنك لان اني عن طريق البنك ادفع فواتيري (الموبايل والى اخره)..

FIDO=هذه شركة اتصالات اني خطي ماخذته منهم هنا النظام غالبا فاتورة شهرية واكو كروت تعبئة بس الاغلب ميفضلها 
نظام الدقائق يعني شلون ...
اكو 35 دولار ينطيك 350 دقيقة بالويكند فري الدقائق بعد الساعة السابعة مساءاا الى الساعة السابعة صباحا فري الدقائق ..
وياه10 دولارات خدمة اظهار اسم المتصل والرسالة الصوتية+التاكس يعني اني شهريا ادفع 58 ومرات توصل الى اكثر اذا خلصت الدقائق 350 وعديتها ابدي ادفع على كل دقيقة اصرفها 20 سنت الدقيقة الاتصال الخارجي بس تتصل وتسوي وياهم بكج 45 سنت الدقيقة المسج 20 سنت ويسوون عروض بين فترة وفترة ممكن تحصل المسجات فري طول الوقت الدقيقة تقل سعرها ايضا...واكو اكثر دقائق وازيد سعر واكو اقل دقائق واقل سعر بس الافضل هو هذا 35 دولار..

بعد السنة الاولى =بعد ماتنتهي السنة الاولى اللك ويكون خلص مراح تستلم الراتب الشهر ياللي كنت تاخذه...
واذا بعدك مالكيت شغل اكو نظام مساعدة اخر تقدمه الحكومة الكندية ...وهو نظام الوليفر

الوليفر=هو راتب شهري ميعدي 500 دولار الا بحالات وهي..
اولا=اذا كنت مريض ومرض مزمن يزيدون 100...
اذا عندج مراجعة دورية للطبيب يعني بالشهر اربع او خمس مرات يزيدون 100..
اذا سويت اي عمل تطوعي باي مكان خلال السنة الاولى وبعدها ايضا يزيدون 100....والعمل التطوعي هنا يسموه(الفولنتير)..
هدية منهم تشجيعية اذا اشتغلت حتى لو شي بسيط ينطوك 250 دولار مرة وحدة فقط...
اخواني واخواتي اول ماوصلنا كندا احنا وصلنا ساعة ستة ونص المساء...ومن ركبنا التكسي لان هم يكونون وياك لحد ميوصلوك الى الموتيل كوستا والكل يعرفه صار مشهور بس هسة يكولون انه راحوا وغيروا مقرهم لان يريدون يسوون ترميمات بيه...
المهم اول ماركبنا التكسي ومشينا بشوارع كندا اني بجيت وهواية بجيت شنو السبب ورة بجيي شفت كندا البلد اللي جنت احلم اوصله من مدة اقامتي في مصر اربع سنين اني والعائلة خفت انه مراح ارتاح هنا بلد جان كئيب بالليل وثلج بسيط بالشوارع حسيت بوحشة غريبة ومحبيت اصلا البقاء ومن وصلنا الى الموتيل زاد هالشي بداخلي وكلت يمكن صعب التاقلم هنا ..اللغة زينة شوية واكدر امشي اموري لكن لشوكت؟؟؟؟
مرض امي بعدها تعبنا هواية وهناك مومثل مصر تكسي عشرين جنيه تظل ساعة تفتر وياه هنا لا صعدة التكسي وفتحة العداد مالتهم 4,25 دولار بالبداية والحجية مو مال باص واصعد وانزل والجو بارد فكانت صعبة الامور بالاول ..

هسة كملنا سنة هنا والحمد لله ...هواية امور تغيرت وياية اني بالذات شفت كندا غير هواية ...
الحياة بيها جميلة ,الناس لطيفين ويحبون المساعدة ومو عيب انه تكولولهم اني مااعرف احجي انكليزي تشوفه يدورلك اللي يكدر يحجي لغتك حتى بس يساعدك او يحجي وياك بكل بطئ حتى تفهم اللي يريد يكوله ..
اتعلمت وقوت لغتي هسة احسن من قبل بهواية ..
المدرسة والمواظبة عليها شي مهم ,اكو حالة كانت وياية بالمدرسة جانت (ليفل 1)جانت متحب تقرا ولاتحاول ان تحسن لغتها جنت اسالها ليش تكول شكو بيها مدام الدولة دتفعلي فلوس خليني اشوكت مااتعلم اتعلم كلتلها اللغة الج مو للدولة ..كالت عادي لاتهملون لغتكم والتعلم شي اساسي للاستمرار بالحياة مو شرط للشغل لكن لسهولة العيش هنا اذا كانت عندك لغة..
الاختلاط بالاجانب افضل من الاختلاط بالعرب وذللك لتعلم اللغة الانكليزية اسرع..
بالمدرسة حتى يخلونا منحجي بلغتنا بالصف ياخذون ربع دولار اذا سمعوا احد يحجي بالصف طبعا اني هواية اتاخرت بتجاوز الليفل الدراسي وهو انه جنت مريضة واخذت اجازة من المدرسة طولت بيها ...
هنا الشي الجميل والرائع انه ميتدخلون بخصوصياتك والاروع انه عندهم ثقة ومصداقية يعني حتى لو جنت تكذب ميشككون بكلامك ويكولولك انت ممكن دتكذب علينا لا الحياة عندهم
 ثقة وسهلة مو صعبة.

0 التعليقات:

MST GROUP

حول الموقع:

مرحبا بكل زوار الموقع الكرام.. أعزائي وأخوتي موقع ستايل كندا هو موقع مختص بالهجرة الكندية والفيز الكندية بأنواعها الدراسية والسياحية وهجرة المقاطعات ونظام الكفالات الخاصة ويهدف الى تعريف المواطن العربي بشكل عام بطبيعة الحياة والعمل والدراسة في كندا بحكم خبرتي في هذا المجال لأني في الأصل مواطن عراقي هاجر الى كندا وأستقر في أونتاريو خلاصة خبرتي هذه أضعها بين أيديكم لكل طامح في الهجرة نحو حياة الحرية وتحقيق الطموح ...الموقع يقدم خدمة الأستشارة والنصح لكل من يرغب بالقدوم الى كندا وبالذات مقاطعة اونتاريو - تورنتو للتواصل عبر الخاص عبر العناوين التالية mstservice66@gmail.com WhatsApp /(+16479228597)/ /(+18077909900)/ /(+16472370759)/

اشترك معنا في هنا كندا