الخبرة الكندية … فضفضة .. وتعريف

لو سألت أي مهاجرجديد .. أو خليني أقول نسبة كبيرة منهم … إيه أكبر مخاوفك وانت بتفكر في الهجرة إلى كندا … هتلاقي الإجابة هي … الحصول على عمل مناسب …. 

تخوف منطقي … فالغول الأكبر عندما هاجرت إلى كندا في نهاية عام 2012م كان … الخبرة الكندية …. اللي من غيرها مافيش شركة هتقبلك في وظيفة مقبولة … وعلشان تحصل عليها لازم يكون عندك واسطة أو تدور على أي وظيفة تحقق من خلالها الهدف ده … حتى لو كانت الوظيفة مش حسب التطلعات …. 

إذا … العنصرية والتحزب … هما الهاجس الأكبر للمهاجرين العرب …. فالهنود هم المسيطرون على مجال كذا … والفلبينيون مسيطرون على مجال مش عارف ايه … الخ الخ الخ … واحنا ديما كعرب … مضطهدين ومالناش خير في بعضينا …. 

الكلام ده سمعته وقريته قبل ماأوصل لكندا … والكلام ده سمعته برضه لما وصلت تورونتو من الناس اللي عايشة فيها ولسة مااشتغلتش .حسب التطلعات …. والكلام ده اللي كان خلاص بدأ يتسلل لعقلي في بدايات تواجدي في كندا ….

كل الكلام أعلاه علشان أقول الآتي .. وبعد خبرة سنتين في سوق العمل الكندي …. 

1- كل واحد وله تجربته الخاصة … ماتقارنش نفسك بحد … قصص النجاح كثيرة .. ابحث عنها … وتفاءل بها … مافيش مانع تتعلم برضه من أخطاء من لم يحالفهم الحظ … بس المهم انك تتعلم بس … مش تُحبط 

2- اعمل بحث صغير في المدن كلها عن فرص العمل اللي ليها علاقة في مجالك …. وشوف كده متطلباتهم ايه …. وهل تملك هذه المتطلبات … والا لسة محتاج تتعلم مهارة جديدة أو تاخد شهادة جديدة … أو تحصل على رخصة مهنية لموازلة عملك في كندا … الخ الخ … ابحث عن مدى جاهزيتك للإنخراط في سوق العمل … وحط لنفسك الخطة المناسبة لتأهيل نفسك لسوق العمل الكندي …

3- اللي خلاك تسيب الدنيا كلها وتيجي لكندا … مافيش مشكلة يعني لو عشت فيها في أي مكان لغاية ماتحصل على الخبرة الكندية … طبعا أي مكان فيه الحد الأدني من متطلبات الحياة كما تراها … 

4- للأسف .. الناس بتتعلم من أخطاءها … واللي قبلنا عملوا بلاوي كتيرة .. بتخلي الناس تخاف فعلا من مجرد التعامل معانا … باتكلم هنا عننا كعرب …. انت نفسك وانت بتقدم على وظيفة انت شايفها مش مناسبة ليك … بتقول لنفسك اهي أي حاجة أمشي بيها أموري لغاية ماالاقي الأفضل منها …. وكأن صاحب العمل ده ملزوم أنه ياخدك لغاية ماتلاقي حاجة أحسن وتقوله مع السلامة وهو يخسر الوقت والجهد اللي بذله معاك في التدريب والتعليم … 

5- ايوة .. أعرف أكتر من واحد نزلوا كندا على طول على سوق العمل .. وفي مجال عملهم … موجودين والله … وعلشان أكون أوضح .. كل اللي أعرفهم في مجال تقنية المعلومات …. 

6- أعرف شخصيا على الأقل أكثر من عشرين وظيفة في مجال تقنية المعلومات وإدارة المشاريع مفتوحة لمدة شهور ومش لاقيين الشخص المناسب ليها …. ولما يلاقوا .. هو مايوافقش … 

7- أعرف شخصيا العشرات من اللي جم ساسكتون واشتغلوا فيها شهور معدودة لغاية مالقيوا وظائف في مدن أخرى أكبر وانتقلوا للحياة هناك … مخلفين وراءهم شكوك أكبر من أصجاب العمل تجاه كل من يتقدم لوظيفة لديهم من خارج ساسكتون .

8- أثناء المقابلات … يهتم الشخص المسؤول بمدى جدية المتقدم للوظيفة في الاستقرار في ساسكتون .. أكثر من الإهتمام بخبراته الوظيفية .. وطبعا هناك شكوك كبيرة تحوم حول المهاجرين الجدد .. الذين أثبتوا حسب التجارب أنهم يأتون إلى هنا لمدد قصيرة .. ويغادرونها سريعا جدا … 

الخير كتير فعلا …. اتحدث عن مجال تقنية المعلومات وإدارة المشاريع هنا في ساسكتون … لكن تخوفات أصحاب العمل أكبر بكثير من حاجتهم الملحة لملء هذه الوظائف 

إن ماكنتش جاد في بحثك عن العمل … ماتزعلش لما ماتلاقيهوش …. 

الإستثناءات موجودة دائما … فلو شعرت من كلامي أنك استثناء … فتجاهله من فضلك ….

في النهاية .. تعريف الخبرة الكندية من واقع تجربتي … هي انك تلاقي واحد في كندا شايف إنك إنسان جاد …. ومجتهد … وبس

بالتوفيق للجميع

 بقلم عبدالرحمن الطويل