سلبيات وايجابيات كندا من تورونتو...من وجهـــة نظر لاجيء .....الجزء الأول

بسمة أمل في منتدى الجيران كتبت عن تجربتها في كندا حيث انها أتت الى كندا كلاجئة قبل ثمان سنوات واستقرت في مقاطعة اونتاريو تورنتو وحبت تنقلكم الصورة على لسانها كما هي 

اليوم احب اتكلم عن  كندا السلبيات وكذالك الأيجابيات وهي كثيرة....
بالاول احب احجي عن السلبيات وبعدها الايجابيات لاترك طابع جميل بداخل كل واحد الله يسهل امره ويوصل كندا بخير وسلامة 

اللغة=الاساس بالحياة هنا ممكن تصادف بعض الاماكن القليلة اللي يشتغل بيها شخص يتكلم العربية لكن قليل .رجاءا لاتغلطون غلطتنا ومتقوون لغتكم قبل متجون هنا حتى بالاساس همينة تكون الكم فرصة للشغل اسرع .

الجو =هو اكيد الجو بارد واحنا بطبعنا ممتعلمين على جو بارد بهالشكل لكن اللي عاش بعمان شاف البرد والثلج نسبيا ...
الثلج بكثافة ينزل صعوبة المشي بعض الاحيان لكثرة الثلج وخاصة بالنسبة اللي عنده شخص كبير بالسن ابوه او امه...

غلاء المعيشة=الايجارت غالية هنا ايجار الشقة ثلاث غرف ومو شقة جيدة بالمستوى الجيد ايجارها يتراوح 1250 -1350
الغرفتين وصالة 1200
الغرفة وصالة 925

اهم شي هنا الكل يدور الشقة ويكون سعر الايجار مرتبط اكثر شي بقرب العمارة من محطة (السبوي والباصات )والمحلات خضار اكل خدمات انت بحاجة الها طبيب العائلة يكون قريب (المول) اساسي هنا الناس للبرد اللي يكون يحبون يقضون العطلة دائما داخل المولات لحرية الحركة والدفء....

الضريبة على المبيعات=هنا كل شي عليه ضريبة ماعدا الفاكهة الخبز الحليب الخضراوات يمكن اكون غفلت عن بعض الاشياء البسيطة لكن الباقي كله عليه ضريبة وتصل بعض الضريبة الى 12-15% .

التامين على السيارت =هنا اذا تحب تشتري سيارة لازم ولابد تسوي تامين على السيارة وتدفع شهريا مبلغ يوصل الى 400 دولار اللي يسوق جديد في كندا يعني سنة اولى اله ماعنده خبرة بمرور الوقت ينزل التامين للخبرة اللي تكتسبها بالسياقة هنا والعمر اله دور كبير التامين اللي عمره جوة العشرين وبين الخمسة والعشرين التامين غالي يبدي بعد 30 يعني اقل بنسبة بسيطةوالسيارة وموديلها ايضا اله دور بارتفاع التامين يعني كل ماتكون جديدة اغلى التامين.

تاخر المواعيد=يعني هنا بكد ماهو بلد منظم وجميل لكن مشكلته المواعيد اللي تتعب بالفعل يعني كل شغلة تروحلها تاخذ مواعيد طويلة المدى 
وخاصة الاطباء الاختصاص كل طبيب يوصل الموعد الى ثلاثة اشهر الانتظار وبهذه الفترة طبيب العائلة يعالجك لوصول موعدك.
وايضا اذا مثلا الطبيب ينطيك موعد 1:00 الظهر تدخله بعد نص ساعة وبعض الاحيان اكثر لكن اذا انت جيت متاخر عشر دقائق يروح موعدك ويمكن يخلوك تنتظر لاخر المراجعين او لا (ويخصمون فلوس الكشف وزيادة فوكه) يعني اذا عندك موعد تروح قبله بربع ساعة تصدكون يااخوان رحت اسوي امتحان الرخصة g2وصلت قبل الموعد بخمس دقائق اجلوني على موعدى بعده بثلاث ارباع الساعة يلة سويته بس على عنادهم الحمد لله نجحت واخذت الرخصة رغم التوتر اللي سببه الي بالتاخير...

بعض السلبيات اللي شفتها مع الاسف الشديد واكولها علنا...

انت من تكون بالغربة تحتاج الى ايد تنمد اللك لانك ببساطة غريبيييييييييييييييييييييييييب...
ممكن تكدر تدبر امورك اذا انت ببلد عربي وتمشيها لكن من تكون ببلد كبير مثل كندا وانكليزيتك مو هذا المستوى العالي تحتاج..لكن...اتعرفت على عوائل مااحب اكول انهم من بلدي مع الاسف الشديد..ويمكن هم هنا اكثر من سنتين وثلاث ..
من تطلب الشي منه كانه دتطلب شي او تسال عن شي صعب المنال ...لاجواب صريح..لامساعدة معنوية ولا عملية...مجرد اسئلة ..انت منين ..وليش انت هنا ...وشلون طلعتلك كندا..انت محظوظ والله ...وعلى هذا المنوال ..........

لكن احب اكولكم انه الحياة هنا مراح تقتصر على فلان انه يسساعدك وراح تلكى عوائل مو عربية ولامن بلدك تمد اللك ايد المساعدة وهي الممنونة الك...

الايجابيات واعتقدها كثيرة وراح تخليكم مطمانين انكم وان صعبت الحياة وممكن تشوفوها صعبة لكن هي بالفعل حياة هنا لمستقبل اولادكم وحتى الكم لاثبات ذاتكم وكونك تكون انسان وتحس بيها بمنتهى الروعة هي وجودك بكندا او حتى خارج كندا في اي دولة تثبت النا انه الانسانية والعطف والاحترام موجود وماانفى من العالم ....

راتب اول سنة =بالنسبة اللي عمره اكبر من 18 ويكون ملفه منفصل لوحده بس هو اكيد وية العائلة راتبه 740 دولار واجتي في وقتها زيادة من الدولة صار الراتب 780 دولار ...هذا بالنسبة النا لان اعمارنا فوق 30 سنة وملفاتنا منفصلة لكن خروجنا عائلة وحدة .مااعرف بالنسبة للازواج لكن كانت وياية عائلة تاخذ هي وزوجها 1350 دولار وية بنوتتها 100 يعني 1450 دولار وللعلم بنتها عمرها سنتين..

وعلى فكرة القرض اللي اخذناه اللي هو التكت الطيران والفحص الطبي ومبلغ من توصل ينطوك اياه بحدود 500 دولار قرض لبداية حياتك هنا للتلفون وايجار شهر تقريبا وبعض المصاريف 
هذا ماعدا المنحة من الحكومة واللي هي جانت 1200 دولار لكل شخص حسب ماشفت انه تختلف من كل شخص الى اخر ماادري باي حساب هم يحسبوها لذلك اكو اختلاف ...تدفع للقرض شهريا 76 دولار للدولة ...

780وين تروح كل شهر=طبعا احنا نتشارك بالايجار لان ولاواحد يشتغل لحد الان 
1250ايجار الشقة +100 انترنيت وتلفون ارضي +مصاريف الاكل والشرب والمواصلات اللي انت تعرف شلون تقدرها هذا الحساب طبعا بالنسبة النا عائلتي ...
الكل نوعا ما غالي مو رخيص لكن يمكن الكل سمع عن الحي الصيني هذا يااخوان ارخص مكان تلكة بيه الخضراوات والفاكهة وباقي الاشياء باسعار جدا معقولة وبكل منطقة تقريبا راح تلاكي منه...
حاجة بدولار ايضا مكان رخيص لبداية حياة معقولة بكندا وبكل محل حاجة بدولار راح تلاكي ايضا مو بس بدولار لا بدولار وربع مرات حاجة بدولارين او دورلار ونص ماعدا التاكس(الضريبة)لكن هواية شغلات جيدة تلكي بيه وتساعدك ...
اكو مكان اسمه (COSTCO)وهذا الويب سايت مالته(WWW.COSTCO.CA)هذا يااخوان مكان تلكة بيه هواية اشياء منزلية وغذائية وصحية وحتى صيدلية لكن هذا يكون نوعا ما نكدر نسميه بالجملة يعني مثلا الرز واسكر يكون اكياس كبيرة مال عائلة يعني الاشياء بعبوات كبيرة مثل الزيت والعصائر واي شي ثان هذا اخواني تسوون اشتراك سنوي وياهم الكارت 100 دولار اكو نسبة من الفلوس توصلها وكل ماوصلت لهذه النسبة يرجعون مبلغ من المال اللك يعني 2400 صرفت بالسنة يرجعون 45 دولار اللك وكل مازادت اتزيد النسبة بس لازم تسوي كارت وتكدر تشتري منهم اذا ممسوي كارت وتكدر حتى معارفك يستخدمون هالكارت وانت تستفاد...

عندكم اماكن معروفة هنا وتكون اسعارها جدا جيدة والكم بعض الاسماء

WALMART=هذا هواية افرع اله وبيه اشياء منزلية وغذائية وملابس واسعاره جيدة والوحيد اللي يكون فاتح الى ساعة 11 بالليل ماعدا العطلة الى ساعة 8 والاحد اعتقد اقل وقت ..

TONE TAI SUPERMARKET= هذا الصيني اللي سبق وان تكلمت عنه ....

FOODLAND= هذا تلكون بيه حلال لحم ودجاج واسعاره معقولة ....

TD CANADA TRUST=هذا يااخواني بنك تقريبا احسن بنك لان معاملاته سهلة وببداية تواجدك في كندا تحتاج الى السهولة بالتعامل مو التعقيد الى حد متكون اوكي حول على اي بنك انت ترغب بيه...اكو شغلة مهمة هنا في كندا واعتقد كل الدول لكن ممكن نكون غافلين عنا احنا ...وهي VISA جدا مهمة هذا البنك اله حد معين للفيزة وهو ...اقل شي 500 دولار ويوصل الى 5000 دولار تزيد مع مرور فترة على كولتهم ثقة بين وبينهم واللي انه تسدد حسابك دون تاخير